دریائے سندھ میں منگل، بدھ کی شب سیلاب کا خدشہ
کراچی: سندھ حکومت نے خبردار کیا ہے کہ منگل اور بدھ کی درمیانی شب دریائے سندھ میں شدید سیلاب کا خدشہ ہے، جس سے اندازاً 16 لاکھ افراد متاثر ہوسکتے ہیں۔
وزیر اعلیٰ سندھ مراد علی شاہ کو وزیر آبپاشی جام خان شورو نے دریائی صورتحال پر بریفنگ دی۔ ان کے مطابق:
گڈو بیراج پر پانی کی آمد 3 لاکھ 83 ہزار کیوسک اور اخراج 3 لاکھ 50 ہزار کیوسک ریکارڈ کیا گیا۔
سکھر بیراج پر آمد 3 لاکھ 13 ہزار کیوسک اور اخراج 2 لاکھ 59 ہزار کیوسک ہے۔
کوٹری بیراج پر پانی کی آمد 2 لاکھ 64 ہزار کیوسک جبکہ اخراج 2 لاکھ 33 ہزار کیوسک رہا۔
ابھی تک بیراجوں کی صورتحال قابو میں ہے مگر پانی کے بڑھتے بہاؤ نے خطرے کی گھنٹی بجادی ہے۔
مراد علی شاہ نے متعلقہ محکموں اور ضلعی انتظامیہ کو ہدایت دی کہ:
دریا کے بند اور نہری نظام کی سخت نگرانی کی جائے۔
کچے کے علاقوں میں رہنے والے افراد فوری طور پر انتظامیہ سے تعاون کریں۔
صوبائی وزراء خود فیلڈ میں موجود رہ کر صورتحال کا جائزہ لیں۔
وزیراعلیٰ نے کہا کہ ممکنہ سیلاب کے پیش نظر 500 سے زائد کیمپ قائم کیے جاچکے ہیں تاکہ متاثرین کو فوری پناہ دی جا سکے۔
وزیر اطلاعات شرجیل میمن نے کراچی میں فلڈ کنٹرول روم کا افتتاح کرتے ہوئے میڈیا کو بریفنگ دی۔ انہوں نے کہا:
"دو یا تین ستمبر تک ریلہ سندھ میں داخل ہوسکتا ہے، جس سے 16 لاکھ افراد متاثر ہوسکتے ہیں۔”
"تمام صوبائی وزراء فیلڈ میں ہیں، قیاس آرائیوں سے گریز کیا جائے۔”
"فی الحال شہروں کو کوئی خطرہ نہیں، اور اگر مزید بارش نہ ہوئی تو صورتحال معمول پر رہنے کی توقع ہے۔”
شرجیل میمن نے مزید بتایا کہ:
ہر 3 گھنٹے بعد بیراجوں میں پانی کے اخراج و آمد کے اعداد و شمار شیئر کیے جائیں گے۔
کچے کے علاقوں میں مقیم لوگوں کو محفوظ مقامات پر منتقل کرنے کے اقدامات جاری ہیں۔
لائیو اسٹاک کے لیے الگ کیمپس قائم کیے گئے ہیں، اب تک 300 سے زائد کیمپس مال مویشیوں کے لیے لگائے جاچکے ہیں۔
"ہم اس وقت صورتحال کو سپر فلڈ کی طرح ڈیل کررہے ہیں، لیکن فی الحال بند میں شگاف ڈالنے کی ضرورت نہیں۔”
دریائے سندھ میں آنے والا ممکنہ سیلاب سندھ کی بڑی آبادی کے لیے خطرے کی گھنٹی ہے۔ اگر پانی کا بہاؤ مزید بڑھا تو لاکھوں افراد متاثر ہوسکتے ہیں۔ تاہم حکومت سندھ نے یقین دہانی کرائی ہے کہ وہ اس صورتحال سے نمٹنے کے لیے مکمل طور پر متحرک ہے۔
مزید پڑھیں
خیبرپختونخوا نیا تعلیمی کلینڈر — کے پی میں 2 سمسٹرز پر مشتمل تعلیمی سال کا اعلان
