جماعت اسلامی کراچی نے صوبائی اسمبلیوں کی منظوری سے نئے صوبے بنانے کی حمایت کردی
کراچی : جماعت اسلامی کراچی نے صوبائی اسمبلیوں کی اجازت سے ملک میں نئے صوبے بنانے کی حمایت کر دی ہے۔ جماعت اسلامی کراچی کے امیر منعم ظفر خان نے کہا ہے کہ اگر صوبائی اسمبلیاں مزید انتظامی یونٹس کے قیام کی منظوری دیتی ہیں تو 32 صوبے بنائیں یا 12، اس میں کوئی قباحت نہیں، "بسم اللہ کریں”۔
نئے صوبوں کے قیام پر جماعت اسلامی کا موقف
منعم ظفر خان کے مطابق پاکستان جیسے بڑے ملک میں بہتر انتظامی ڈھانچے اور عوامی سہولت کے لیے مزید صوبے بنانے ناگزیر ہو چکے ہیں۔ انہوں نے کہا کہ ملک کو ترقی اور عوام کو ریلیف دینے کے لیے صوبائی اسمبلیوں کو نئے صوبوں کے قیام پر فیصلہ سازی کرنی چاہیے۔
تقریب سے خطاب میں جماعت اسلامی کراچی کے امیر نے صدر میں آتشبازی کے سامان کے گودام میں ہونے والے دھماکے پر افسوس کا اظہار کیا۔
جاں بحق افراد کے لواحقین کو معاوضہ دینے کا مطالبہ
متاثرہ دکانداروں کے نقصان کا ازالہ کرنے کی اپیل
ذمہ دار سرکاری اہلکاروں کو گرفتار کرنے اور سزا دینے کا مطالبہ
انہوں نے کہا کہ رہائشی علاقوں میں اس طرح کے دھماکا خیز مواد رکھنے کی مکمل پابندی ہے، لیکن شہر کے مرکز میں بارودی کارخانہ قائم تھا، جس نے کئی قیمتی جانیں نگل لیں۔ اس حوالے سے سخت کارروائی کرنا حکومت کی ذمہ داری ہے۔
سیاسی حلقوں میں حالیہ دنوں میں ملک میں مزید صوبے بنانے پر بحث چھڑ گئی ہے۔
کچھ جماعتیں انتظامی بنیادوں پر نئے صوبوں کے حق میں ہیں۔
جبکہ دیگر کا ماننا ہے کہ اس سے وفاق مزید کمزور ہو سکتا ہے۔
جماعت اسلامی کراچی کی حمایت کے بعد یہ معاملہ دوبارہ ملکی سیاست میں موضوعِ بحث بن گیا ہے
