چین نے نوجوان ماہرین کیلئے نیا ’K‘ ویزا متعارف کرایا
چین نے سائنس اور ٹیکنالوجی کے شعبے میں نوجوان ماہرین کو راغب کرنے کے لیے ایک نیا ویزا پروگرام متعارف کرا دیا ہے جسے ’K‘ ویزا کا نام دیا گیا ہے۔ یہ ویزا یکم اکتوبر سے نافذ ہوگا اور اس کے تحت اہل افراد کو داخلے، قیام اور بار بار آمد و رفت کی سہولت زیادہ آسانی کے ساتھ فراہم کی جائے گی۔
یہ اقدام اس وقت سامنے آیا ہے جب امریکا نے اپنے H1B ورک ویزا کی فیس میں بے پناہ اضافہ کردیا ہے، جس کے باعث عالمی سطح پر ٹیلنٹ کو مشکلات کا سامنا ہے۔
K ویزا کے تحت دی جانے والی سہولتیں
اس نئے ویزا کے تحت نوجوان ماہرین کو چین میں مختلف شعبوں میں کام کرنے کی اجازت دی جائے گی۔ خاص طور پر تعلیم، ثقافت، سائنس اور ٹیکنالوجی کے شعبے اس میں شامل ہیں۔
ویزہ ہولڈرز کاروباری تحقیق اور جدید منصوبوں کا حصہ بن سکیں گے، جبکہ اس کے لیے کسی بھی ملکی آجر یا ادارے کی جانب سے دعوت نامہ درکار نہیں ہوگا۔
چینی حکام کے مطابق یہ ویزا پروگرام بین الاقوامی تعاون بڑھانے اور عالمی ٹیلنٹ کو اپنی طرف متوجہ کرنے کی پالیسی کا حصہ ہے۔ نوجوان ماہرین کو زیادہ سہولتیں فراہم کر کے چین سائنسی و تکنیکی ترقی میں اپنی پوزیشن مزید مضبوط بنانا چاہتا ہے۔
امریکی ورک ویزا فیس میں بے تحاشا اضافہ
گزشتہ دنوں امریکی صدر نے امیگریشن پالیسی سخت کرتے ہوئے H1B ورکر ویزا کی سالانہ فیس ایک لاکھ ڈالر مقرر کردی تھی۔ یہ فیصلہ عالمی سطح پر شدید تنقید کا شکار ہوا ہے کیونکہ اس کے بعد ہزاروں ماہرین کے لیے امریکا میں مواقع محدود ہو گئے ہیں۔
ایچ ون بی ویزا کے حوالے سے نیا ایگزیکٹو آرڈر نافذ کر دیا گیا ہے جس کے بعد دنیا بھر کے نوجوان سائنسدان اور ٹیکنالوجی ایکسپرٹس امریکا جانے کے بجائے دیگر ممالک کے مواقع تلاش کر رہے ہیں۔
ماہرین کا کہنا ہے کہ امریکا میں ورک ویزا کی فیس میں اضافے کے بعد چین کا ’K‘ ویزا جنوبی ایشیا سمیت دنیا کے دیگر خطوں کے ماہرین کے لیے پرکشش متبادل ثابت ہوسکتا ہے۔ خاص طور پر وہ نوجوان جو سائنس اور ٹیکنالوجی کے شعبوں میں نمایاں کردار ادا کرنا چاہتے ہیں، انہیں چین کی یہ نئی اسکیم زیادہ سہولت فراہم کرے گی۔
چین کا نیا ویزا پروگرام نوجوان سائنسدانوں اور ماہرین کے لیے عالمی سطح پر ایک بڑا موقع فراہم کر سکتا ہے۔ دوسری جانب امریکا کی پالیسیوں کے سبب وہاں مواقع محدود ہوتے جا رہے ہیں۔ یہی وجہ ہے کہ چین کا ’K‘ ویزا مستقبل میں بین الاقوامی سطح پر نمایاں توجہ حاصل کرے گا۔
مزید خبریں
پنجاب حکومت کا جدید کچرا ٹھکانے لگانے کا منصوبہ، رنگدار کوڑے دانوں کی تنصیب کا آغاز
