وزیراعظم شہباز شریف: پاکستان میں سیاست کا حق سب کو مگر بغاوت کی اجازت کسی کو نہیں
اسلام آباد: وزیراعظم شہباز شریف نے کہا ہے کہ پاکستان میں ہر شہری کو سیاست اور احتجاج کا حق حاصل ہے مگر ریاست کے خلاف بغاوت یا جلاؤ گھیراؤ کی اجازت کسی کو نہیں دی جائے گی۔
یوم آزادی اور معرکہ حق کی تقریب سے خطاب
جناح اسپورٹس کمپلیکس اسلام آباد میں یوم آزادی اور "معرکہ حق میں فتح” کی تقریب سے خطاب کرتے ہوئے وزیراعظم نے کہا کہ وقت آچکا ہے کہ ہم سیاسی تقسیم، ذاتی مفادات اور کھوکھلے نعروں سے آگے بڑھ کر پاکستان کے لیے اجتماعی سوچ اپنائیں۔
انہوں نے تمام سیاسی جماعتوں، اسٹیک ہولڈرز اور سول سوسائٹی کو "میثاق استحکام پاکستان” کا حصہ بننے کی دعوت دی۔ وزیراعظم کے مطابق یہ صرف معیشت کی بحالی کا منصوبہ نہیں بلکہ وسیع تر قومی مفاد کی بنیاد ہے۔
وزیراعظم شہباز شریف نے اپنے خطاب میں واضح کیا:
سیاست کا حق سب کو ہے مگر ریاست کے خلاف بغاوت کا نہیں۔
احتجاج کا حق سب کو ہے مگر جلاؤ گھیراؤ کا نہیں۔
تنقید کا حق سب کو ہے مگر توہین اور گالی کی اجازت نہیں۔
ان کا کہنا تھا کہ اب کسی نئے فتنے کو جگہ نہیں دی جائے گی اور اس سوچ کو کسی صورت پنپنے نہیں دیا جائے گا۔
وزیراعظم نے کہا کہ "معرکہ حق” نے ثابت کیا کہ پاکستانی قوم اپنی آزادی کی حفاظت کرنے کی بھرپور طاقت رکھتی ہے۔ یہ صرف ایک جنگ نہیں بلکہ دو قومی نظریے کی کامیابی تھی۔
انہوں نے تحریک پاکستان کے قائدین اور کارکنوں کو سلام عقیدت پیش کرتے ہوئے کہا کہ بھارت کا غرور 4 دن میں خاک میں ملا اور آنے والی بھارتی نسلیں اس شکست کو یاد رکھیں گی۔
وزیراعظم نے زور دیا کہ پاکستان کی ایٹمی طاقت جارحانہ سوچ نہیں رکھتی بلکہ یہ دفاعی حکمت عملی کا حصہ ہے۔ بھارت کی جوہری طاقت کے مقابلے میں ہم نے اپنے دفاع کو مضبوط کرنے کا فیصلہ کیا تھا تاکہ ملک کی آزادی اور سلامتی یقینی بنائی جا سکے۔
انہوں نے کہا کہ مشکل گھڑی میں پاکستان کے دوست ممالک — چین، سعودی عرب، ترکیہ، آذربائیجان، یو اے ای اور ایران — نے پاکستان کے مؤقف کی کھل کر حمایت کی۔
وزیراعظم نے امریکی صدر کا بھی شکریہ ادا کیا جنہوں نے جنگ بندی کے لیے ٹھوس کوششیں کیں اور امید ظاہر کی کہ ڈونلڈ ٹرمپ کشمیر کے مسئلے کو اقوام متحدہ کی قراردادوں کے مطابق حل کروائیں گے۔
معاشی استحکام کی پیش رفت
وزیراعظم نے اپنے خطاب میں بتایا کہ:
مہنگائی کی شرح 34 فیصد سے کم ہو کر 5 فیصد پر آگئی ہے۔
شرح سود 21 فیصد سے گھٹ کر 11 فیصد ہو گئی ہے۔
قومی خزانے میں عدلیہ کے تعاون سے 100 ارب روپے سے زائد جمع ہوئے۔
انہوں نے آرمی چیف جنرل سید عاصم منیر کا شکریہ ادا کیا کہ انہوں نے سول حکومت کا بھرپور ساتھ دیا۔
وزیراعظم نے کہا کہ غزہ اور کشمیر میں بے گناہوں کا خون بہہ رہا ہے، اور پاکستان ہمیشہ فلسطین اور کشمیر کے عوام کے ساتھ کھڑا رہے گا جب تک انہیں ان کے حقوق نہیں مل جاتے۔
مزید پڑھیں
یوم آزادی 14 اگست: وفاقی دارالحکومت کی شاندار سجاوٹ اور پروقار رونق نے جشن کو دوبالا کر دیا
