پاکستان کا 78واں یوم آزادی ملی جوش و جذبے کے ساتھ منایا گیا
اسلام آباد: پاکستان کا 78واں یوم آزادی آج پورے ملک میں ملی جوش و جذبے اور حب الوطنی کے جذبات کے ساتھ منایا جا رہا ہے۔ دن کے آغاز پر ملک کے مختلف شہروں میں توپوں کی سلامی دی گئی اور نماز فجر میں ملکی سلامتی، یکجہتی، امن اور خوشحالی کے لیے خصوصی دعائیں مانگی گئیں۔
جشن آزادی کا آغاز اور تقریبات
رات 12 بجتے ہی پورے ملک میں جشن آزادی کا آغاز ہو گیا۔ بھارت کے خلاف تاریخی فتح اور آزادی کا جشن منانے کے لیے گلی گلی اور محلے محلے سبز ہلالی پرچموں سے سجا دیے گئے۔ کراچی، لاہور، اسلام آباد، پشاور، کوئٹہ اور ملتان سمیت ملک کے کونے کونے میں چراغاں اور آتش بازی کا شاندار مظاہرہ کیا گیا۔
شہری بڑی تعداد میں سڑکوں پر نکل آئے اور جگہ جگہ جشن آزادی کی ریلیاں نکالی جا رہی ہیں۔
مرکزی تقریب: یوم آزادی اور معرکہ حق کی فتح
بدھ کو جناح اسپورٹس کمپلیکس اسلام آباد میں یوم آزادی اور معرکہ حق کی فتح کی مرکزی تقریب منعقد ہوئی، جس میں صدر مملکت آصف علی زرداری، وزیراعظم شہباز شریف، تینوں مسلح افواج کے سربراہان، وفاقی کابینہ، ارکان پارلیمنٹ اور دوست ممالک کے سفراء شریک ہوئے۔
تقریب میں مسلح افواج پر مشتمل میوزک بینڈ نے شاندار مارچ پاسٹ کیا، جبکہ پاک آرمی، پاک بحریہ، پاک فضائیہ، پنجاب رینجرز اور ایف سی خیبرپختونخوا کے چاق چوبند دستوں نے بھی مارچ پاسٹ میں حصہ لیا۔
وزیراعظم نے یادگارِ معرکہ حق کے ماڈل کی نقاب کشائی بھی کی۔
توپوں کی سلامی اور خصوصی دعائیں
لاہور میں دن کے آغاز پر 21 توپوں کی سلامی دی گئی اور مساجد میں نماز فجر کے بعد ملکی ترقی اور خوشحالی کے لیے خصوصی دعائیں کی گئیں۔
کوئٹہ میں بھی کینٹ ایریا میں 21 توپوں کی سلامی دی گئی، جبکہ مزار قائد کراچی اور مزار اقبال لاہور میں گارڈز کی تبدیلی کی پروقار تقریبات ہوئیں۔
مزید پڑھیں
وزیراعظم شہباز شریف: پاکستان میں سیاست کا حق سب کو مگر بغاوت کی اجازت کسی کو نہیں
