الیکشن کمیشن نے شبلی فراز، عمر ایوب سمیت 9 ارکان پارلیمنٹ کو نااہل قرار دے دیا
اسلام آباد: پاکستان الیکشن کمیشن نے پاکستان تحریک انصاف (پی ٹی آئی) کے رہنماؤں سینیٹر شبلی فراز اور رکن قومی اسمبلی عمر ایوب سمیت 9 ارکان پارلیمنٹ کو نااہل قرار دے دیا۔ یہ فیصلہ 9 مئی کے مقدمات میں سزا یافتہ ہونے کی بنیاد پر سنایا گیا ہے۔
الیکشن کمیشن آف پاکستان (ای سی پی) نے ایک اہم فیصلہ کرتے ہوئے پی ٹی آئی کے نو ارکان پارلیمنٹ کو نااہل قرار دے دیا۔ نااہل ہونے والوں میں پانچ ارکان قومی اسمبلی، ایک سینیٹر اور تین ارکان پنجاب اسمبلی شامل ہیں۔
نااہل قرار دیے گئے ارکان میں رائے حیدر علی، صاحبزادہ حامد رضا، رائے حسن نواز اور زرتاج گل شامل ہیں۔ اس کے علاوہ ارکان پنجاب اسمبلی انصر اقبال، جنید افضل اور رائے محمد مرتضیٰ اقبال بھی اس فیصلے کی زد میں آئے ہیں۔
ای سی پی نے ان ارکان کی نشستیں خالی قرار دیتے ہوئے باضابطہ طور پر ڈی نوٹیفائی کر دیا ہے۔
یاد رہے کہ 31 جولائی کو فیصل آباد کی انسداد دہشت گردی عدالت نے 9 مئی کے تین مختلف مقدمات کا فیصلہ سنایا تھا جس میں 196 ملزمان کو مختلف سزائیں سنائی گئیں۔ ان مقدمات میں عمر ایوب، شبلی فراز اور زرتاج گل سمیت دیگر رہنماؤں کو 10 سال قید کی سزا دی گئی۔
خصوصی عدالت نے پہلے دو مقدمات میں 168 ملزمان کو 10، 10 سال جبکہ تیسرے مقدمے میں جنید افضل ساہی کو 3 سال قید کی سزا سنائی۔ عدالت کے فیصلے کے بعد الیکشن کمیشن نے یہ نااہلی کا عمل مکمل کیا۔
یہ اقدام سیاسی منظرنامے میں ایک بڑی پیشرفت سمجھی جا رہی ہے، جو پی ٹی آئی کی پارلیمانی نمائندگی اور آئندہ انتخابی حکمت عملی پر گہرا اثر ڈال سکتا ہے۔
