سیلاب کے دوران پاک فوج کی دن رات امدادی سرگرمیاں، ترجمان آئی ایس پی آر کا عزم
ڈی جی آئی ایس پی آر لیفٹیننٹ جنرل احمد شریف چوہدری نے سیلاب متاثرین کے حوالے سے جاری امدادی کارروائیوں کی تفصیلات بتاتے ہوئے کہا ہے کہ پاک فوج مشکل کی ہر گھڑی میں عوام کے ساتھ کھڑی ہے۔ ان کا کہنا تھا کہ چاہے امن ہو یا جنگ، فوج اپنے عوام کو کبھی تنہا نہیں چھوڑے گی۔
ترجمان پاک فوج کے مطابق امدادی کارروائیوں کے دوران قوم کے دو سپوت شہید اور دو جوان زخمی بھی ہوئے ہیں۔ انہوں نے کہا کہ فوج کے افسران اور جوان دن رات عوام کی خدمت کے لیے مصروف ہیں اور یہ قربانیاں اس بات کی علامت ہیں کہ فوج عوام کے ساتھ کندھے سے کندھا ملا کر کھڑی ہے۔
لیفٹیننٹ جنرل احمد شریف چوہدری نے واضح کیا کہ ورکنگ باؤنڈری پر کسی بھی پوسٹ کو خالی نہیں کیا گیا۔ سیلابی صورتحال کے باوجود دہشت گردوں اور خارجی عناصر کے خلاف آپریشنز جاری ہیں تاکہ ملک کے امن و امان کو ہر صورت یقینی بنایا جا سکے۔
فلڈ ریلیف آپریشنز کی تفصیلات
ڈی جی آئی ایس پی آر نے بتایا کہ:
پنجاب، خیبرپختونخوا اور آزاد کشمیر میں فلڈ یونٹس تعینات ہیں۔
ایک انجینئر بریگیڈ، 19 انفنٹری اور 7 انجینئرنگ یونٹس امدادی سرگرمیوں میں مصروف ہیں۔
فوجی ہیلی کاپٹرز اب تک 26 پروازیں کر چکے ہیں۔
گجرانوالہ میں 6 انفنٹری اور 2 انجینئرنگ یونٹس کام کر رہی ہیں، جب کہ بہاولپور اور بہاولنگر میں 4 یونٹس کو اسٹینڈ بائی پر رکھا گیا ہے۔ خیبرپختونخوا میں بھی میڈیکل بٹالین متاثرین کو سہولت فراہم کر رہی ہے۔
ترجمان نے بتایا کہ پاک فوج کے انجینئرز اور سول انتظامیہ کی کوششوں سے اب تک 104 سڑکیں کلیئر کی جا چکی ہیں۔ شاہراہ قراقرم بھی بحال کر دی گئی ہے۔ کرتارپور میں ایک بڑا ریسکیو آپریشن جاری ہے جہاں لوگوں کو محفوظ مقامات پر منتقل کیا جا رہا ہے۔
لیفٹیننٹ جنرل احمد شریف چوہدری نے مزید کہا کہ:
اب تک 225 ٹن راشن سیلاب متاثرین میں تقسیم کیا جا چکا ہے۔
20 ہزار سے زائد افراد کو طبی سہولیات فراہم کی گئی ہیں۔
گلگت بلتستان اور آزاد کشمیر میں بھی فضائی ریلیف آپریشن کیے جا رہے ہیں۔
ڈی جی آئی ایس پی آر نے کہا کہ چاہے پاکستان کا کوئی بھی کونا ہو، فوج اپنے عوام کے ساتھ کھڑی ہے۔ ان کا کہنا تھا کہ کوئی باطل قوت عوام اور فوج کے درمیان دراڑ نہیں ڈال سکتی۔ "سیلاب کے وقت میں دن رات کام ہورہا ہے، حالت جنگ ہو یا امن، پاک فوج ہمیشہ عوام کے ساتھ ہے۔”
مزید پڑھیں
چناب، راوی اور ستلج میں غیر معمولی سیلابی صورتحال، بھارت سے نئی اطلاعات کے بعد فلڈ الرٹ جاری
