بھارت کےستلج میں پانی چھوڑ دیا، پاکپتن میں 23 دیہات ڈوب گئے،
بھارت نے ایک بار پھر دریائے ستلج میں پانی چھوڑ دیا ہے جس کے نتیجے میں پاکستان کے مختلف علاقوں خصوصاً ضلع پاکپتن میں سیلاب کی صورتحال سنگین ہوگئی ہے۔
بھارتی ہائی کمیشن نے پاکستان کی وزارت آبی وسائل کو پانی چھوڑنے کے حوالے سے باضابطہ طور پر آگاہ کیا، جس کے بعد فلڈ الرٹ جاری کردیا گیا۔
پی ڈی ایم اے پنجاب کی وارننگ
پی ڈی ایم اے پنجاب کے مطابق اس وقت دریائے ستلج میں ہریکے ڈاؤن اسٹریم اور فیروزپور ڈاؤن اسٹریم کے مقامات پر اونچے درجے کا سیلاب ریکارڈ کیا گیا ہے۔
اس سلسلے میں ضلعی انتظامیہ کو ہدایت جاری کی گئی ہے کہ شہریوں کی جان و مال کے تحفظ کو یقینی بنایا جائے اور متاثرہ علاقوں میں ریسکیو کارروائیاں تیز کی جائیں۔
فلڈ کنٹرول روم کے مطابق ضلع پاکپتن کے مختلف علاقے شدید متاثر ہوئے ہیں۔
23 گاؤں مکمل طور پر ڈوب گئے
53 گاؤں جزوی طور پر زیرِ آب آ گئے
64,663 افراد متاثر ہوئے
اب تک 24,974 افراد محفوظ مقامات پر منتقل کیے جا چکے ہیں
سیلابی پانی سے 66,913 ایکڑ رقبہ تباہ ہوگیا ہے
سیلاب کے خطرات کے پیش نظر اب تک 4,106 مویشیوں کو بھی محفوظ مقامات پر منتقل کیا جا چکا ہے تاکہ مقامی کسانوں کے معاشی نقصان کو کم سے کم کیا جا سکے۔
دریائے ستلج کے بپھرنے سے زرعی زمینیں زیرآب آنے کے باعث کھڑی فصلیں تباہ ہوگئیں۔
پانی کھڑا رہنے کے سبب مقامی آبادی کو نہ صرف مالی نقصان کا سامنا ہے بلکہ ماہرین نے خبردار کیا ہے کہ ان علاقوں میں مختلف بیماریاں پھوٹنے کا خدشہ بھی بڑھ گیا ہے۔
ریسکیو 1122، ضلعی انتظامیہ اور دیگر ادارے سیلاب متاثرین کی مدد کے لیے مسلسل کام کر رہے ہیں۔
فوری طور پر لوگوں کو محفوظ مقامات پر منتقل کیا جا رہا ہے، تاہم کھانے پینے کی اشیاء، ادویات اور پینے کے صاف پانی کی قلت سب سے بڑا چیلنج ہے۔
فلڈ ماہرین کے مطابق بھارت کی جانب سے بار بار پانی چھوڑے جانے سے نہ صرف ستلج بلکہ دریائے سندھ کے دیگر حصے بھی متاثر ہو سکتے ہیں۔
مزید خبریں
نیپال میں نوجوانوں کا احتجاج شدت اختیار کرگیا، وزیراعظم کے پی شرما اولی مستعفی
نیپال کے مختلف شہروں میں گزشتہ ہفتے سے جاری نوجوانوں کے احتجاج نے ملک کو سیاسی بحران کی لپیٹ میں لے لیا ہے۔ مظاہرین نے جہاں مختلف عوامی مقامات پر دھرنے دیے، وہیں کئی اہم سیاسی شخصیات کے گھروں کو بھی نشانہ بنایا گیا۔
وزیراعظم کے استعفے کی تصدیق
نیپالی وزیراعظم کے سیکرٹریٹ دفتر کی جانب سے جاری بیان میں کہا گیا ہے کہ وزیراعظم کے پی شرما اولی نے اپنے عہدے سے استعفیٰ دے دیا ہے۔ یہ فیصلہ ملک گیر احتجاج اور عوامی دباؤ کے باعث سامنے آیا ہے۔
احتجاج کرنے والے نوجوانوں کا مؤقف ہے کہ موجودہ حکومت عوامی مسائل حل کرنے میں ناکام رہی، بالخصوص روزگار کے مواقع پیدا کرنے اور بدعنوانی کے خاتمے کے حوالے سے کوئی عملی اقدامات نہیں کیے گئے۔
