میڈیا جمہوریت کے چوتھے ستون کا کردار ادا کر رہا ہے، عطاء اللہ تارڑ

کراچی (نمائندہ خصوصی) وفاقی وزیر اطلاعات و نشریات عطاءاللہ تارڑ نے کہا ہے کہ میڈیا جمہوریت کے چوتھے ستون کا کردار ادا کر رہا ہے، آزاد اور خودمختار میڈیا کی حمایت کرتے ہیں۔

بدھ کو یہاں گورنر ہاﺅس میں کراچی پریس کلب کے وفد سے ملاقات کے دوران گفتگو کرتے ہوئے کہی۔ ملاقات میں صحافیوں اور میڈیا ورکرز کی فلاح و بہبود سے متعلق امور پر بھی تبادلہ خیال ہوا۔

وفاقی وزیر اطلاعات نے کہا کہ وزیراعظم شہباز شریف کی خصوصی ہدایت پر میڈیا ہاﺅسز اور اخبارات کے واجبات کی ادائیگی کے لئے اقدامات اٹھائے۔ انہوں نے کہا کہ وہ جلد کراچی پریس کلب کا دورہ کر کے صحافیوں سے تفصیلی ملاقات کریں گے۔ اس موقع پر کراچی پریس کلب کے صدر سعید سربازی اور جنرل سیکریٹری شعیب خان نے وفاقی وزیر اطلاعات کو صحافیوں اور میڈیا ورکرز کو درپیش مسائل سے آگاہ کیا۔ وفاقی وزیر اطلاعات نے مسائل کے حل کی یقین دہانی کرائی۔

وفاقی وزیر اطلاعات نے صدر کراچی پریس کلب سعید سربازی اور جنرل سیکریٹری شعیب خان کو کراچی پریس کلب کے لئے 10 لاکھ روپے کا چیک بھی پیش کیا۔