سلطان اذلان شاہ کپ ہاکی ٹورنامنٹ کے فائنل میں جاپان نے پاکستان کو شکست دے دی۔ اذلان شاہ کپ ہاکی ٹورنامنٹ کا فائنل ملائیشیا کے شہر ایپوہ میں کھیلا گیا
تیرہ سال بعد اذلان شاہ ہاکی ٹورنامنٹ کا فائنل کھیلنے والی قومی ٹیم کے لئے فائنل کا آغاز اچھا نہ تھا، جاپان نے پہلا گول اسکور کر کے برتری حاصل کی لیکن کچھ ہی دیر بعد قومی ٹیم نے اعجاز احمد کے گول کی بدولت مقابلہ برابر کردیا۔
میچ کے تیسرے کوارٹر میں قومی ٹیم نے جارحانہ حکمت عملی اپناتے ہوئے جاپان کے خلاف حملوں کا سلسلہ جاری رکھا اور اس کا صلہ قومی ہاکی ٹیم کو اس وقت ملا جب عبدالرحمان نے گیند کو گول پوسٹ میں پہنچا کر پاکستان کو میچ میں ایک گول کی برتری دلا دی لیکن میچ کے چوتھے کوارٹر میں جاپان نے گول کر کے مقابلہ برابر کر دیا۔
قومی ٹیم اس ٹورنامنٹ میں ناقابل شکست رہی اور فائنل سے قبل کھیلے گئے پانچ میچوں میں سے تین جیتے اور دو میچز ڈرا کیے۔
پاکستان اس سے قبل تین بار اذلان شاہ ہاکی ٹورنامنٹ کا ٹائٹل جیت چکا ہے اور آخری بار 2003 میں اذلان شاہ ہاکی ٹورنامنٹ جیتا تھا۔
اس سے قبل تیسری اور چوتھی پوزیشن کے لیے کھیلے گئے میچ میں نیوزی لینڈ نے میزبان ملائیشیا کو 2-3 سے شکست دے کر کانسی کا تمغہ اپنے نام کیا۔
