مشعال حسین ملک نے بچوں کے حقوق سے متعلق معاشرے کے اتحاد و اتفاق اور ایکشن کو ضروری قرار دیا ہے۔
اسلام آباد: وزیراعظم کی معاون خصوصی برائے انسانی حقوق و ترقی نسواں مشعال حسین ملک نے بچوں کے حقوق کے نفاذ کے لیے مشترکہ کوششوں پر زور دیا ہے۔ وہ نیشنل کمیشن آن دی رائٹس آف چائلڈ این سی آر سی کے اسٹریٹجک پلان 26 -2023 اور بچوں کی اسمگلنگ پر پالیسی بریف کی تقریب رونمائی سے خطاب کر رہی تھیں۔ این سی آر سی کے اسٹریٹجک وژن کو تشکیل دینے کے لیے کلیدی اسٹیک ہولڈرز، بچوں کے حقوق کے ماہرین اور سول سوسائٹی سے تعلق رکھنے والے افراد نے اپنا حصہ ڈالا ہے۔ بچوں کے حقوق کے حوالے سے منعقدہ اس تقریب میں معاون خصوصی کی فوکل پرسن سبین حسین ملک اور مشعال حسین ملک اور یاسین ملک کی بیٹی رضیہ سلطانہ نے بھی شرکت کی۔
تقریب سے خطاب میں معاون خصوصی نے ملک کے بچوں اور نوجوانوں کو درپیش چیلنجوں کے خلاف متحدہ محاذ کی اہمیت پر زور دیا۔
وزیر اعظم کی معاون خصوصی نے تیزی سے بدلتے ہوئے سماجی و اقتصادی منظرنامے کے تناظر میں بچوں کے حقوق کو درپیش چیلنجز پر روشنی ڈالی۔ انہوں نے چائلڈ رائٹس کے معاملے پر دور اندیشی اور حالات سے موافقت کی ضرورت پر زور دیا۔ انہوں نے کہا کہ این سی آر سی کے منصوبے میں بیان کردہ اسٹریٹجک وژن کے ذریعے ہمیں 2026 تک بچوں کے حقوق کے نفاذ میں واضح بہتری نظر آ ئے گے۔ انہوں نے کہا کہ این سی آر سی اور این سی آر سی کی چیئر پرسن عائشہ کی طرف سے پیش کردہ اسٹریٹجک وژن دراصل پاکستان کے بچوں کے لیے ایک بہتر مستقبل کا وعدہ ہے۔
مشعال حسین ملک نے بچوں کے حقوق کے معاملے میں پائیدار تبدیلی کے لیے باہمی تعاون اور تبدیلی کی نت نئی حکمت عملیوں کے اہم کردار پر زور دیا۔ انہوں نے بچوں کی اسمگلنگ سے نمٹنے اور اس مسئلے کو فعال طور پر حل کرنے کے لیے ایک جامع رہنمائی فراہم کرنے پر این سی آر سی کی کوششوں کی تعریف کی۔ انہوں نے کہا کہ این سی آر سی کا اسٹریٹجک منصوبہ بچوں سے متعلق مخصوص چیلنجوں کا جارحانہ انداز میں مقابلہ کرنے کے لئے کمیشن کے غیر متزلزل عزم کی عکاسی کرتا ہے۔
وزیر اعظم کی معاون خصوصی نے تمام اسٹیک ہولڈرز سے اتحاد اور ایکشن کی ضرورت پر زور دیتے ہوئے کہا کہ وہ سٹریٹجک پلان میں بیان کردہ وژن کو حقیقت میں بدلیں۔ انہوں نے آنے والے سالوں میں بچوں کی تقدیر کا تعین کرنے کےلئے معاشرے کی اجتماعی کوششوں پر زور دیا۔ انہوں نے کہا کہ ہمیں نہ صرف ہر بچے کے حقوق کو تسلیم کرنا ہوگا بلکہ اس بات کو بھی یقینی بنانا ہوگا کہ بچوں کے حقوق کو فعال طور پر نافذ کیا جائے۔ انہوں نے مزید کہا ان اقدامات سے ہمارے بچے ایسے ماحول میں پروان چڑھیں گے جو ان کی حقیقی صلاحیتوں کو پروان چڑھائیں گے۔
مشعال حسین ملک نے ان تمام اسٹیک ہولڈرز کی تعریف کی جنہوں نے این سی آر سی کے اسٹریٹجک پلان کی تشکیل میں کردار ادا کیا۔ انہوں نے مزید کہا کہ بچوں کے حقوق اور انکا روشن مستقبل ہماری ان مشترکہ اقدار میں شامل ہیں جو قوم کو اکٹھا کرتی ہے۔
