اسلام آباد:
پاکستان کی جانب سے چائناک پاکستان اکنامک کوریڈور (سی پیک) پاور پرچیز معاہدوں پر نظر ثانی سمیت کچھ اہم شرائط پر بروقت عمل درآمد نہ کر پانے کی صورت میں عالمی بینک نے پاکستان کے لیے 500 ملین ڈالر سے زیادہ کا بجٹ سپورٹ قرض منسوخ کر دیا۔
ایکسپریس ٹریبیون کی رپورٹ کے مطابق واشنگٹن میں مقیم قرض دہندہ رواں مالی سال کے دوران کوئی نیا بجٹ سپورٹ قرض بھی فراہم نہیں کرے گا، جس سے حکومت کے رواں مالی سال کے دوران 2 بلین ڈالر کے تازہ قرضے حاصل کرنے کے بجٹ کے تخمینے پر اثر پڑ سکتا ہے۔
رپورٹ کے مطابق سرکاری ذرائع نے بتایا کہ قرض دہندہ نے سستی اور صاف توانائی پروگرام کے تحت 500 سے 600 ملین ڈالر کا قرض منسوخ کر دیا تھا، جسے PACE-II کہا جاتا ہے۔ ابتدائی طور پر عالمی بینک نے 500 ملین ڈالر کا قرضہ فراہم کرنے پر رضامندی ظاہر کی تھی، جسے بعد میں اس نے بیرونی مالیاتی فرق کو پر کرنے کے لیے 600 ملین ڈالر کا اشارہ کیا۔
