جمعیت علماء اسلام کے سینئر رہنما مولانا عبدالغفور حیدری نے کہا ہے کہ ہمیں مجوزہ آئینی ترامیم کا مسودہ ابھی تک نہیں ملا، حکومت سے کہا ہے کہ آئینی ترامیم میں جلدی نہ کرے، اجلاس میں اپنا موقف پیش کریں گے۔
اتوار کو پارلیمنٹ ہائوس کے باہر میڈیا سے گفتگو کرتے ہوئے انہوں نے کہا کہ حکومت کا وفد بھی جے یو آئی سے ملاقات کیلئے آیا، ہم نے ان سے یہی کہا کہ آئینی ترامیم کا مسودہ ہمیں نہیں ملا، جب ملے گا تو اسے پڑھ کر جائزہ لیں گے۔ یہی بات پی ٹی آئی کے وفد سے بھی ہوئی۔
انہوں نے کہا کہ جب تک آئینی ترامیم کا مسودہ پڑھ نہیں لیتے اس وقت تک اس پر کوئی بات نہیں کی جا سکتی۔ حکومت سے بھی کہا ہے کہ وہ اس معاملے میں جلدی نہ کرے۔ حکومت اگر جلدی کرے گی تو اس میں شامل نہیں ہوں گے۔
